شاهد معنا نشرة أخبار التكنولوجيا الأسبوعية من 15 أكتوبر حتى 21 أكتوبر

17 sec read

1- هنبدأ نشرتنا بخبر الهجوم على الإنترنت اللى حصل يوم الجمعة واللى استهدف خدمة نطاقات الإنترنت  DNS اللى بتقدمها شركة  Dynالموجودة فى الساحل الشرقى للولايات المتحدة الأمريكية، الهجوم كان عبارة عن هجمات DDos واللى اتسببت فى توقف كتير من المواقع العملاقة على الإنترنت زى تويتر وريديت وأمازون وسبوتيفاي وGithub وكتير غيرهم لدرجة إن المصادر بتقول إن نصف الإنترنت توقف عن العمل، وصرحت خدمة DynDNS أن سيرفراتها تعرضت للهجوم الساعة 11:10 وفق التوقيت العالمي، وإن الهجوم استمر أكتر من ساعتين حتى تم إستعادة الخدمات والمواقع للعمل مجدداً، مفيش أى معلومات عن مصدر الهجوم، ومفيش أى إتهام لجهة معينة، أو إذا كان الهجوم ده مرتبط بالهجمات الروسية ضد أنظمة الانتخابات الإلكترونية فى الولايات المتحدة خاصة مع اقتراب مواعيد الإنتخابات الرئاسية.

2- الشبكة الاجتماعية الشهيرة فيس بوك أعلن عن ميزة جديدة في خدمة البث المباشر وهي امكانية جدولة البث لتوقيت محدد، التحديث الجديد ده هيتيح لكتير من الناس اللي بتعمل بث مباشر انها تعرف المتابعين على وقت البث بالظبط ويقدروا يستنوه في نفس البوست بدل ماكان بيتم الاعلان عن البث في بوست لوحده وينزل بعد كده البث في بوست تاني.

3- كمان أعلنت شركة فيس بوك عن إضافة ميزة البث المباشر جوه تطبيق ماسنجر التابع لها، والميزة الجديدة بتحمل اسم Instant Video وبتسمح للمستخدم تسجيل بث مباشر داخل دردشة ماسنجر بدل النصوص، وفقا لما جاء على المدونة الرسمية لشركة فيس بوك إن الميزة الجديدة مثالية لتقاسم ومشاركة اللحظات الهامة بشكل سريع مع الأصدقاء وده هيخليها مسلية وتفاعلية بشكل أفضل، والميزة الجديدة تم إطلاقها داخل التحديث الأخير لتطبيق ماسنجر على هواتف الأندرويد والآيفون، ميزة Instant Video هيا ميزة منافسة لسناب شات بشكل مباشر.

4- منصة بث الفيديو فيميو  Vimeoالشهيرة والمنافسة ليوتيوب أعلنت إنه هيتم اطلاق خدمة البث المباشر علشان المستخدمين يقدروا يعملوا اي بث مباشر على فيميو زي يوتيوب وفيس بوك بالظبط، والخاصية الجديدة دى من المنتظر إنها تنطلق أواخر السنة دي.

5- الشركة الصينية LeEco عقدت مؤتمر يوم الخميس 20 أكتوبر فى الولايات المتحدة الأمريكية للإعلان عن بعض منتجاتها التكنولوجية الجديدة من الهواتف، أعلنت الشركة فى المؤتمر ده عن هاتفها الرائد Le Pro 3 واللى جاى بشاشة قياسها 5.5 بوصة بدقة 1080بيكسل ومعالج Snapdragon 821 ورامات بحجم 4 جيجا بايت ومساحة تخزين داخلية 64 جيجا بايت وكاميرا خلفية بدقة 16 ميجا بيكسل وأمامية بدقة 8 ميجا بيكسل، وبطارية 4070 ميلي أمبير مع دعم تقنية الشحن السريع Quick Charge 3.0  ومنفذ USB Type C وقارئ للبصمة في الجهة الخلفية ويعمل بنظام أندرويد 6.0 مارشميلو مع واجهة EUI وهي واجهة شبيهة بواجهة هواوي  EMUI، الهاتف هيتوفر للبيع يوم 2 نوفمبر وهيكون سعره 399 دولار مع خصم 100 دولار عند بداية بيعه يعنى هيبقى بسعر 299 دولار.

6- وبرضه فى نفس المؤتمر أعلنت الشركة الصينية عن الهاتف المتوسط  Le S3، واللى جاي بشاشة قياسها 5.5 بوصة بدقة 1080بيكسل ومعالج Snapdragon 652  ورامات بحجم 3 جيجا بايت ومساحة تخزين داخلية 32 جيجا بايت وكاميرا خلفية بدقة 16 ميجا بيكسل وأمامية بدقة 8 ميجا بيكسل، بطارية الهاتف قوتها 3,000 ميلي أمبير مع دعم تقنية الشحن السريع Quick Charge 2.0 ومنفذ USB Type C وقارئ للبصمة في الجهة الخلفية ويعمل بنظام أندرويد 6.0 مارشميلو مع واجهة  EUI، الهاتف هيكون متوفر للبيع برضه يوم 2 نوفمبر وهيكون سعره 249 دولار مع خصم 100 دولار في بداية صدوره وبكده هيكون سعره 149 دولار.

7- فى نفس المؤتمر أعلنت شركة Le Eco عن تقنيتها للواقع الافتراضي في نظارة  Explore، نظارةExplore  اللي أطلقتها LeEco بتعمل مع هاتفها Le Pro 3 ، النظارة جاية بتصميم مميز لراحة المستخدم مع بطانة داخلية ومستشعر بيدعم التوقف المؤقت عند نزع النظارة والتشغيل التلقائي عند استخدام النظارة من جديد، بتشير التوقعات استفادة الإصدار ده من نظارات الواقع الافتراضي من منصة Daydream اللى أعلنت عتها جوجل نظراً لدعم تشغيل النظارة عبر نظام الأندوريد، وشركة LeEco بتؤكد توفر النظارة في أسواق الولايات المتحدة في الثاني من نوفمبر، ومفيش تفاصيل عن سعرها أو ميعاد توفرها فى الأسواق العالمية.

8- جوجل أطلقت تطبيق جديد للخلفيات وهو Google Wallpapers ، لو إنت عايز تغير فى شكل هاتفك الأندرويد وتمنحه إطلالة متميزة، بيضم التطبيق باقة من الخلفيات عالية الجودة، مجموعة رائعة من المناظر الطبيعية، ولقطات للتصاميم المعمارية، والفن التجريدي، وبعض الصور الرائعة للأرض من القمر الصناعي ، وفى خاصية تخليك تبدل خلفيات الهاتف يومياً، التطبيق بيقدم تجربة رائعة لتحديد الخلفيات وبيضم العديد من الاختيارات التي تتوافق مع تصميمات الإصدارات الجديدة من الهواتف الذكية.

رابط تحميل التطبيق.

الجدير بالذكر طبقاً لتقرير من موقع بلومبيرج؛ إن المراجعات الإيجابية للهاتفين بيكسل اللى أعلنت عنهم جوجل يوم  أكتوبر تسببوا في ارتفاع قيمة سهم الشركة بشكل كبير خلاه يوصل إلى 828.81 دولار في الظهيرة، وهو أقصى رقم تصل إليه قيمة أسهم شركة جوجل من ساعة دخولها البورصة، وفى النهاية استقر السهم عند 821 دولار تقريبًا، المفروض أن مالكي هواتف بكسل وبكسل إكس إل يبدأوا يستلموا هواتفهم يوم 20 أكتوبر ، ومن المتوقع ساعتها ارتفاع سهم جوجل تانى لو ماظهرتش أى مشاكل للمستخدمين.

9- أطلقت شركة سامسونج هاتفها الجديد Galaxy C9 وهو هاتف من الفئة المتوسطة وجاي بشاشة كبيرة بقياس 6 بوصة بدقة 1080*1920 بيكسل. واستخدمت سامسونج فيه معالج سناب دراجون 653 ثماني النواة مع معالج رسوميات Adreno 510  وده بيخليه فى أعلى الفئة المتوسطة، الهاتف كمان جاى بـ 6 جيجابايت من الذاكرة العشوائية، و 64 جيجابايت من ذاكرة التخزين الداخلية مع إمكانية الزيادة عبر بطاقات خارجية، الهاتف بتصميم معدني وكاميرا خلفية بدقة 16 ميجابيكسل ووكاميرا أمامية برضه 16 ميجا مع فتحة عدسة عريضة f1.9.، يعتمد الهاتف منفذ USB-C مع دعم اتصالات الجيل الرابع و الصوت عالي الجودة Hi-Fi مع بطارية سعتها 4000 ميلي أمبير. يعمل الهاتف بنسخة أندرويد مارشملو 6.0.1 وجاى بأتنين لون هما الذهبي والوردي من الحواف والخلف مع اللون الأبيض من الأمام ويباع في الصين بسعر 470 دولار، وده بيعتبر أول هاتف من سامسونج برامات 6 جيجابايت.

10- أعلنت آبل عن مؤتمر جديد يوم ٢٧ اكتوبر هتعلن فيه عن أجهزة ماك بوك الجديدة، الشائعات بتقول أن Apple تنوي إعادة بناء منتج MacBook Pro بالكامل مع تصميم جديد وابتكار طرق جديدة للتعامل مع الجهاز. وده يخليه أول تغيير على MacBook Pro من سنة 2012، المزايا المتوقعة طبقاً للشائعات المنتشرة هي حصول الماك بوك برو على تصميم أخف وأنحف مع لوحة مفاتيح تعتمد تقنية الفراشة التي استخدمتها Apple في منتج MacBook، ومن غير المتوقع حدوث تغيير على حجم الشاشة أو وضوحها، ولكن أكيد هيكون في تقنيات تحسّن من الألوان والسطوع والحد من الانعكاس، برضه متوقع اعتماد وصلات USB-C في مختلف منتجات الماك، الميزة الأكبر اللى هنشوفها في أحد منتجات MacBook هي شاشة لمس صغيرة أعلى لوحة المفاتيح، ومن المتوقع أن الشاشة دى تكون مخصصة لتسهيل الوصول إلى خصائص النظام والتطبيقات، فى انتظار المؤتمر والجديد من أبل.

11- أما عن الأخبار المحلية وبعد ما أعلنا فى نشرة الأسبوع اللى فات عن حصول شركة أورانج على تصريح خدمات الجيل الرابع بمبلغ 495 مليون دولار نصفهم بالجنية المصرى، الأسبوع ده فودافون واتصالات حصلوا على الرخصة لتقديم الخدمة الرخصة .. فودافون دفعت مبلغ ٣٣٥ مليون دولار، أما اتصالات دفعت مبلغ ٥٣٥ مليون دولار .. الترددات المتاحة لخدمات الـ 4G فى مصر كانت 25 ميجاهرتز، حصلت أورانج على تردد 10 ميجا واتصالات حصلت على ترددات 10 ميجاهرتز برضه وبكده اتبقى 5 ميجاهرتز حصلت عليهم فودافون، وبكده رسمياً مصر دخلت عصر الجيل الرابع لخدمات المحمول بوجود 4 شركات بتتنافس هما المصرية للاتصالات وفودافون وأورانج واتصالات ومن المتوقع إطلاق الخدمة أوائل عام 2017.

Journas

Never miss a story from us, get a weekly update to your inbox