شاهد معنا نشرة أخبار التكنولوجيا الأسبوعية من 23 سبتمبر حتى 30 سبتمبر

14 sec read


1. أول أخبارنا هيكون عن حدث جوجل القادم يوم 4 أكتوبر واللى هتعلن فيه الشركة العملاقة عن مجموعة من منتجاتها وطبعاً أبرز ما سيتم الكشف عنه هما هاتفي Pixel و Pixel XL. واللى ظهرت عنهم كتير من التسريبات فى الأيام الماضية ونشر حساب ون ليكس الشهير مقطع فيديو لتصميم ثلاثى الأبعاد للهاتف Pixel XL بيعرض فيه الهاتف من جميع الزوايا بشكل واضح ونشر الحساب أبعاد الهاتف اللى هييجى بسمك 7.3 ميليمتر من الأسفل و 8.5 ميليمتر من الأعلى، وبطول 154.72 ميليمتر وعرض 75.74 ميليمتر.

** لسه مع أخبار جوجل اللى أعلنت يوم 27/9 عن إطلاق منصة “YouTube مسلسلات وده بالتعاون مع الشركات المالكة لحقوق النشر في سوريا ومصر لتوفير أكثر من 500 مسلسل على هذه المنصة الجديدة، والقناة الجديدة بتحتوى على أكثر من 7000 ساعة من المسلسلات العربية القديمة والحديثة، وتم تصنيفها تصنيفات كتيرة زى أجدد المسلسلات، والدراما، والكوميديا، والمسلسلات السورية والمصرية وغير ذلك الكثير، والقناة دى هتقضى على ظاهرة القرصنة ورفع المسلسلات بجودة رديئة على اليوتيوب وهيتيح للشركات المنتجة فرصة الربح من مسلسلاتهم من خلال الإعلانات.

يمكنك مشاهدة القناة من خلال هذا الرابط 

** لسه مكملين مع أخبار جوجل وعن تطبيقها للمحادثات Google Allo  واللى أصدرته جوجل الأسبوع الماضي والخبر بيقول إن التطبيق مرات تحميله كسرت حاجز الـ 5 مليون عملية تحميل في متجر Google Play Store. وحصل على مركز التطبيق الأفضل في متجر Google Play Store بالولايات المتحدة الأمريكية في نهاية الأسبوع الماضي.

يمكنك تحميل التطبيق على منصة الأندرويد من خلال هذا الرابط 

يمكنك تحميل التطبيق على منصة iOS من خلال هذا الرابط 

2. أما عن أخبار شركة أبل فى الأسبوع الماضى ظهرت تقارير فى وسائل الإعلام الصينية عن إن شركة آبل هتفتتح مركزها الأول للبحث والتطوير Research & Development في حديقة بكين للعلوم، وإن آبل سجّلت المركز الجديد برأس مال وصل إلى 15 مليون دولار أمريكي تقريبًا وهيتم توظيف 500 شخص علشان يبقوا  مسؤولين عن تطوير مكونات وبرامج الحواسب، ورقاقات الاتصالات ومعالجة الصوت والفيديو، إضافة إلى تقنيات أُخرى لتحسين جودة أجهزة الشركة المُختلفة، ومن المعروف إن آبل عندها مراكز للأبحاث والتطوير في كثير من دول العالم زى فرنسا، واليابان، والسويد، بالإضافة إلى المملكة المتحدة وفلسطين المُحتلّة.

** الخبر التانى عن آبل بيقول إن نظام iOS 10 بالرغم من المشاكل اللى حصلت عند نزول التحديث إلا إنه نجح فى  الوصول إلى نصف أجهزة آبل الذكية     iPhone ، وiPad، وiPod Touch-  وده بعد أسبوعين من إطلاقه حسب التقرير الذي أصدرته شركة Mixpanel المتخصصة في مجال الإحصائيات.

** خبر كمان عن شركة آبل بيقول إن الشركة احتلت المركز الأول في مؤشر رضا المستخدمين داخل الولايات المتحدة الأمريكية متقدّمة على سامسونج اللي جت فى المركز التانى ، وأمازون اللى جت في المركز التالت، وودى بتبقى عبارة عن استطلاعات رأي بيقوم بيها حوالى 3500 مستخدم بتتم مراسلتهم عبر البريد الإلكتروني لمعرفة رضاهم عن الأجهزة الجديدة التي قاموا بشرائها زى حواسب ماك المختلفة أو حواسب أمازون وسامسونج اللوحية، وحصلت آبل السنة دى على نسبة رضا وصلت إلى 84%، ودى نفس النسبة اللى حصلت عليها العام الماضي، فيما ارتفعت نسبة رضا مستخدمي أجهزة سامسونج من 78% العام الماضي إلى 83% هذا العام، وأمازون من 78% إلى 80%.

3. نروح للأخبار عن شركة بلاك بيرى اللى أعلنت الأسبوع اللى فات ده عن خروجها رسميًا من سوق تصنيع الهواتف الذكية، واستمرارها كشركة للبرمجيات، وده بعد سلسلة طويلة من الخسائر استمرّت لسنوات، والخبر ده اتقال خلال حدث إعلان الشركة عن أرباحها واللى قالوا فيه أن الشركة أنهت جميع نشاطاتها الداخلية لتطوير الهواتف وإنها قامت بالاتفاق مع شركاء خارجيين مثل Foxconn و Alcatel لتصميم وتصنيع هواتفها والجدير بالذكر الخطوة دى تمت بعد إعلان الشركة من فترة توقفها عن تطوير نظام تشغيلها BlackBerry OS 10  وانتقالها لاستخدام نسخة مُعدلة من الأندرويد اللى أضافت ليه تطبيقاتها الخاصة، وفى خلال الحدث ده برضه أعلنت الشركة عن إيرادات بقيمة 334 مليون دولار للربع الثاني من عامها المالي، في انخفاض بنسبة 47% مقارنةً بعائداتها في نفس التوقيت للعام الماضى . وده كمان أقل بكثير من المليارات التي كانت بتحققها الشركة (أيام عزّها) وقبل ظهور الأندرويد. انتقال بلاك بيري للأندرويد جه متأخر، ومش عارفين إذا كانت بلاك بيرى هتقدر تقوم من الكبوة دى وتحقق أرباح تانى ولا لأ وده اللى هتكشف عنه الأيام الجاية.

** وبمناسبة كلامنا عن شركة بلاك بيرى فالأسبوع اللى فات ظهرت بعض التسريبات المصورة لهاتفها المرتقب BlackBerry DTEK60 واللى التوقعات بتقول إنه هيكون موجود فى الأسواق قبل نهاية السنة مع شاشة كاملة بخاصية اللمس، بمعنى إنه مش هيتوفر فيه كيبورد وكاميرا خلفية بدقة 21 ميجا بيكسل، وتصميم عالي الجودة مع حواف منحنية، بالإضافة لمستشعر للبصمة في منتصف الجهة الخلفية للهاتف إلى الأسفل، مع نظام تشغيل أندوريد، والتوقعات بتقول إن الأسواق الأولية للهاتف هتكون فى كندا والأسواق الأوروبية والولايات المتحدة بسعر حوالى 530$ تقريباً.

4. فى معانا خبر بيقول إن شركة سبوتيفاى مهتمه بالاستحواذ على شركة ساوند كلاود واللى تم تقييمها فى يونيو بمبلغ 700 مليون دولار أمريكي وطبقاً لتقرير صدر من موقع  Financial Time، الشركتين وصلوا لمرحلة متقدمة فى المحادثات الخاصة بالاستحواذ، ومن المعروف إن سبوتيفاى عندها حوالى 40 مليون مشترك فى خدمتها الموسيقية وساوند كلاود عندها 175 مليون مستخدم ومجتمع كبير من المبدعين وعدد ضخم من الأغانى، أخبار الصفقة كاملة لحد الآن محدش يعرف عنها الكتير وهنكون معاكم بالجديد اللى هيتم فى اتحاد عمالقة عالم الموسيقى على الإنترنت.

5. الإسبوع اللى فات أعلنت شركة شاومى الصينية عن هاتفين من فئة الهواتف الرائدة وهما  Xiaomi Mi 5s و 5s Plus بمعالج Snapdragon 821 و 6 جيجابايت من الذاكرة العشوائية الهاتفين مصممين تصميمًا معدنيًا والاختلافات بين الطرازين في الشاشة والذاكرة وقارئ البصمة.

6. كمان الأسبوع اللى فات أعلنت العملاق الصيني هواوي عن موعد مؤتمرها القادم واللى هينعقد في ألمانيا يوم 3/11 للكشف عن أحدث إصدارات الشركة من الأجهزة المميزة، والتسريبات بتقول إنه هيتم الكشف عن هاتف Mate 9  واللى متوقع إن يطلق برقاقة معالج Kirin 960 من ميديا تيك، كما يأتي النموذج الأكبر بذاكرة عشوائية 4 جيجا بايت رام، وسعة تخزين 256 جيجا بايت، مع توقعات بقدرة بطارية تصل إلى 4000 مللى أمبير، وشريحة SIM مزدوجة، واحنا فى انتظار المؤتمر علشان نعرف التفاصيل الكاملة.

7. كمان معانا خبر عن شركة فيسبوك اللى أعلنت الأسبوع اللى فات عن إطلاق شبكتها الاجتماعية المتخصصة Facebook At Work واللى كانت فى طور التجريب من فبرابر 2015 ودى شبكة اجتماعية بنخلى الشركات تنشئ حساب خاص بيها بيضم تحته موظفين الشركة بنفس الأدوات اللى موجودة فى شبكتها الاجتماعية زى الجروبز والماسنجر والتايم لاين وهيكون الاشتراك فيه طبقاً لعدد الموظفين فى الشركة ولسه لم يتم الإعلان عن السعر النهاى وجدير بالذكر إن الخدمة دى موجود فيها لغاية دلوقتى حوالى 5 مليون ونص مستخدم وفيسبوك هتنافس بشبكتها دى شبكات ألأعمال الشهيرة زى لينكد إن وسلاك، فهل ستستطيع فييسبوك التنافس أم لا ده اللى هنشوفة الأيام الجاية.

8. تطبيق إنستاجرام قام بإصدار تحديث جديد على منصة  Windows 10، والتحديث الجديد للويندوز فيه مميزات كانت موجودة فى التطبيق على منصتي الأندرويد و iOS.زى القدرة على تقريب الصور ومقاطع الفيديو، وتقدر تكبر الصور لأي سبب من الأسباب. الميزة التانية القدرة على إدارة التعليقات، وفى الآخر تقدر تغير ألوان الخط في Stories الخاصة بك.

9. مايكروسوفت كمان اطلقت تحديث لتطبيقها سكايب على iOS  والأندرويد، والتحديث ده رفع التطبيق للإصدار 7.17 والتحديث ده جاب معاه للبطاقات من البوتات وحل المشكلة المتعلقة بتغيير وضعية الجهاز أثناء تسجيل رسالة مرئية، وتبسيط عملية تسجيل الدخول لمستخدمي حسابات مايكروسوفت، تبسيط إكتشاف جهة الإتصال لرقم هاتف مستخدم الحساب.

10. وعلى الصعيد المحلى تم الإعلان عن انعقاد معرض ومؤتمر القاهرة الدولى للاتصالات وتكنولوجيا المعلومات Cairo Ict 2016  خلال الفترة 27- 30 نوفمبر، وده فى مركز القاهرة الدولى للمؤتمرات.

Journas

Never miss a story from us, get a weekly update to your inbox