إعرف إزاي تقدم وتكسب فى مسابقة مركز الإبداع التكنولوجي TIEC

27 sec read

لو إنت رائد أعمال وبتبدأ شركتك الناشئة، أو لسه عندك فكرة ومعاك نموذج مبدئي بيدعم فكرتك أكيد بتواجهك مشاكل البدايات ومنها إنك مش لاقي دعم علشان فكرتك تبقي واقع حقيقي وملموس وإحنا فى جورتك هنساعدك بنصائح علشان تقدم فى مسابقة لدعم واحتضان الشركات الناشئة عاملها مركز الإبداع التكنولوجي TIEC اسمها Start IT.

مسابقة Start IT ومراحلها

الخطوة الأولي : التقديم

المسابقة مفتوحة للتقديم كل 3 شهور يعني 4 مرات خلال السنة والمرحلة اللى مفتوح التقديم ليها هى المرحلة الثانية خلال عام 2017 وبكده لو عندك خطة عمل ونموذج مبدئي ممكن تتقدم لمركز الإبداع التكنولوجى وريادة الأعمال قبل يوم 30 إبريل 2017 وده هيكون أونلاين عن طريق الموقع بتاعهم وتقدم فكرتك.

وده إعلان المركز عن المسابقة

الخطوة الثانية : التقييم

فى الخطوة دي هيتم تقييم الأفكار اللى اتقدمت وبعدها يتم الإعلان عن الطلبات المقبولة واللى اتقبل هينتقل للخطوة اللى بعدها.

الخطوة الثالثة : المقابلة الشخصية

أصحاب الأفكار المقبولة هيتم إعلانهم ودعوتهم لحضور مقابلة شخصية فى مركز الإبداع التكنولوجي فى القرية الذكية، وبعدها هيكون فى إعلان عن الأفكار اللى اجتازت مرحلة المقابلات الشخصية.

الخطوة الرابعة : العروض التقديمية

الأفكار اللى اجتازت مرحلة المقابلة الشخصية هيتم دعوتها لعرض فكرتها وتقديمها

الخطوة الخامسة : الإعلان النهائي عن الفائزين

ودي أخر خطوة واللى بيتم فيها الإعلان عن الفرق الفائزة فى المسابقة.

وده جدول بيوضح مراحل المسابقة كلها وتواريخ نهاية كل مرحلة.

هنا بقي هيكون فى سؤال مهم وهو إيه معايير التقييم للأفكار، تعالوا نشوف معايير التقييم من الموقع الخاص بالمركز

مدى تميز الخدمة أو المنتج المقترح والحافز من طرحها بالسوق.

توفر أسواق مستهدفة واضحة ذات إمكانية نمو عالية

تحليل واضح للمتنافسين

الميزة التنافسية للخدمة أو المنتج

مهارات وخبرة فريق الإدارة

مدي تقدم النموذج الاولي

يجب أن تحتوي خطة العمل المقدمة على الاتي:

           · فهم واضح للمشكلة و / أو الفجوة في السوق و / أو الحاجة السوقيه و / أو الفرصة

           · شرح كامل للمنتج او الخدمه و خصائصها و التقنيات و التكنولوجيا المستخدمه

           · وضع النموذج الاولي حاليا وارفاق كل الصور والروابط اللازمه للتوضيح

           · شرح كامل لحجم السوق المستهدف الاساسي و السوق المجاور

           · المنافسين و الميزه التنافسيه

            · مهارات فريق العمل و خبراتهم و مؤهلاتهم

            · نموذج العمل و مصادر الدخل

             · خطه اطلاق المشروع في السوق والاستحواذ علي الاسواق المستهدفه واستراتيجيات و قنوات التسويق و المبيعات

             · التوقعات الماليه و التخطيط المالي

             · النقاط المرحليه التجاريه و التقنيه تفصيليا لمده سنه علي الاقل

اللى فات ده الكلام الرسمي من موقعهم، إحنا فى الفقرة اللى جاية هنقول على شوية نصائح مهمة (الزتونة يعني) علشان تعرفوا تقدموا فكرة متكاملة أو بمعني أصح إزاي تقدموا فكرتكم بصورة كويسة تخليها تجيب درجات عالية فى مرحلة التقييم والكلام ده إحنا جايبينه من الكنترول بمساعدة ناس داعمة لمجتمع ريادة الأعمال.

1- أول حاجة وأهم حاجة متقدمش بعد إنتهاء ميعاد التقديم اللى هو 30 إبريل 2017.

2- حاول تقدم الطلب بتاعك بدرى علشان تقدر تاخد وقتك وتملآ بياناتك وتقدم فكرتك صح.

3- متنساش تعمل حساب على موقع مركز الإبداع التكنولوجي علشان يكون ليك فرصة إنك تعدل على بيانات التقديم بتاعتك لحد ميعاد التقديم النهائي.

4- الشركة أو الفكرة بتاعتك لازم يكون ليها على الأقل إتنين مؤسسين Technical Founder و Business Founder يعني لو إنت مؤسس تقني ولوحدك دور على حد تاني معاك مناسب لفكرتك ولدماغك ويكون فاهم فى البزنس كويس.

5- الأفضل إنك تقدم Business Plan واضحة وكويسة لفكرتك ومشروعك وركز على كلمة Plan دى يعني مش Business Model ولو محتاج معلومات أكتر ومحتاج تعرف الفرق بين الاتنين ممكن تضغط على الرابط ده أو الرابط ده وتقرأ شوية معلومات هيفيدوك.

6- ممكن تقدم فكرة بس لازم يكون معاك نموذج عمل تجريبي مبدئي بيدعم فكرتك Prototype علشان إمكانية التطبيق وبكده فرصك فى المنافسة تزيد.

7- مش لازم يكون معاك سجل تجارى وبطاقة ضريبية بس لو إنت أسست شركتك ومعاك الورق بتاعها يفضل إن التأسيس ميكونش عدي عليه سنة.

8- الفكرة بتاعتك لازم تكون مبنية على التكنولوجيا أو بتستخدمها كمنتج أساسي للفكرة أو زي مابيقولوا Based on ICT Idea

9- لو عندك فكرة موجود زيها فى السوق يبقي لازم فكرتك تكون فيها حاجة مميزة مش موجودة وبتضيف على اللى موجود فى السوق وتحاول توضح ده فى خطة العمل والعرض التقديمى بتاعك بصورة واضحة علشان تقنع لجنة التقييم بقبول فكرتك وفرصك فى المنافسة تزيد.

10- لو إنت أسست شركتك وجبت استثمار لفكرتك وموجود فى السوق يفضل إنك تسيب مكان لحد جديد يكون بيحاول يلاقي مكان لنفسه لأنك كده هتكون Overqualified زي مابيقولوا وفرصك فى المنافسة هتكون ضعيفة.

11- فريق العمل اللى مقدم الفكرة الأفضل إنه يكون متخرج ومتفرغ لفكرته وممكن واحد من فريق العمل يكون في مرحلة الدراسة لكن مش الفريق كله علشان فرصك فى المنافسة والمكسب تزيد.

12- تاني بنأكد على إنك متقدمش بعد إنتهاء ميعاد التقديم اللى هو 30 إبريل 2017.

– طيب بعد كل المجهود والتعب ده الفرق الفائزة هتستفيد إيه

فترة احتضان لمشروعك لمدة عام، وفى خلال السنة دي هتكون المميزات اللي جاية تحت أمرك:

خدمات عينية تصل إلى 120 ألف جنيه مصري في صورة خدمات استشارية وبرامج وأجهزة حاسب آلي وخدمات تسويقيه.

مكان للعمل مزود بالأثاث الأساسي وتوصيلات الإنترنت.

البرامج الأساسية وأدوات أجهزة الحاسب خلال فترة الإحتضان.

توفير مرشدين فنيين و موجهين .

والأهم من وجهة نظرى هو وجودك فى بيئة داعمة لفكرة ريادة الأعمال ومع ناس هتستفيد من وجودك وسطهم وكفاية تعرف إن شركات كتير من اللى موجودة فى السوق اتخرجت من خلال المسابقة دي او لسه فى 

مرحلة الاحتضان فى مركز الإبداع التكنولوجي نذكر منها علي سبيل المثال لا الحصر 

وكده يبقي إحنا فى جورتك عملنا اللى علينا … الخطوة اللى ناقصة هيا إنك تقدم فى المسابقة ومتستناش على حلمك علشان تبقي جزء مهم من مجتمع ريادة الأعمال فى مصر


رابط التقديم فى المسابقة


ولو عندك أى استفسار أو حابب تعرف معلومة كمان ماتتردش فى إنك تراسل مركز الإبداع التكنولوجي TIEC على الإيميل ده   incubation@tiec.gov.eg

وبالتوفيق للجميع

Journas

Never miss a story from us, get a weekly update to your inbox