الميثولوجيا هو علم دراسة الأساطير ، و هو يستخدم في نطاقات تفسير الأحداث الطبيعة ، و معرفة بعض الاصول للظواهر ……
النهارده اولي حلقاتنا مع ( وتر اخيل ) ….
وتر أخيل أو tendon achiilis ……
وتر موجود في القدم فوق الكعب ……
أخيل هو ابن ملك اسمه بيليوس و حوريه اسمها ثيت س…أمه و هو صغير نزلته مياه نهر مقدس بيفصل ما بين عالم الموتى و الاحياء (لاحظ وجود نهر مشابه في الحضاره الفرعونيه) اسمه ستيكس عشان يبقى من الخالدين و مفيش حاجه تأذيه…بس غلطت غلطه صغيره ..مسكته من كعبه و نزلته فكعبه و الوتر ده ما نزلش في الميه ..
و كمان ابوه بعته لكايرون وده قنطور او ينطور او سنطور المهم كائن كده نصه بني ادم ونص حصان عشان يتعلم القتال .
.المهم كالعاده عراف قالهم انه هيتقتل في حرب فخافوا عليه و لبسوه زي البنات و بعتوه جزيره لملك عشان يستخبى مع بناته …قامت حرب طرواده مابين الاغريق و اهل طرواده…و معلش هنتكلم عن حرب طرواده شويه لاهميتها في الاساطير الاغريقه و لانها رابطه احداث كتير
العرافات قالوا لملك طرواده انه هيتولدله ابن يبقى سبب في خرابها….الابن ده اسمه باريس ….فقرر يتخلص منه و اداه لخادمه اللي سابته في جبل و بقى راعي اغنام …المهم في نفس الوقت 3 الهه ستات هما هيرا و اثينا و افروديت اتخانقوا مين الاحلى و قرروا يحكموا اول واحد يقابلوه…فكان باريس …هيرا اغرته بالسلطه..و اثينا بالحكمه …و افروديت قالتله انها هتديله اجمل نساء الارض …فاختار افروديت طبعا 😀 .
حققت افروديت وعدها…الاول رجعته لطرواده…و اخته كاسندرا فضلت تحذر الناس من رجوعه…بس ما حدش صدقها…لان ابوللو ( اله الرمايه و الموسيقى) حبها و هي رفضته فوهبها البصيره بس خلى الناس ما تصدقهاش …فمحدش صدقها غير اخوهم هيكتور
تاني حاجه افروديت بعتت باريس لاسبرطه عشان يخطف هيلين اجمل نساء الارض و زوجة مينلاوس أخو أجامنون ( أبو اليكترا بتاعة العقده فاكرينها ؟) و فعلا خطفها و رجع بيها طرواده و بكده قامت الحرب
و ما عرفش الاغريق يدخلوها و طبعا برضه عراف قالهم لازم يجيبوا أخيل عشان يكسبوا…بعتوا بطل اسمه اوديسيوس ( بطل الاوديسه ) عشان يلاقيه و لاقاه و اغراه انه يساعدهم عشان يبقى بطل .
قائد جيش الاغريق اجاممنون …اسر بنت اخو ملك طرواده و حبها اخيل و طلب منه يرجعها لابوها فرفض …فساب الحرب واعتزل و رجع الاغريق يخسروا…ابن عم اخيل اسمه باتروكلوس حاول يقنعه يرجع ما عرفش فخد منه لبسه و خوذته عشان يخدع الطرواديين و يخوفهم و نجح في كده بس اتقتل في الاخر و اللي قتله اسمه هيكتور ابن ملك طرواده .
بعدها الاغريق عملوا خدعة حصان طرواده …كان حصان خشب كبير استخبوا فيه مقاتلين منهم و قالوا للطرواديين ده هديه و احنا هننسحب …فدخلوه الطرواديين و احتفلوا و سكروا …فطلع المقاتلين و فتحوا المدينه لللجيش و احتلوها …
الوتر اتسمى على نقطة ضعف أخيل …و طبعا بقى مصطلح شهير يطلق على نقطة الضعف…كعب أخيل …زي ما مصطلح شهير برضه عن الخدعه و المؤامره…حصان طرواده .
