خلود ~ ليسانس اداب فارسي جامعة القاهرة ومحررة صحفية سابقة لدي جريدة مصر النهاردة ومخرجة افلام قصيرة .

ريڤيوو أفلام على السريع

1 sec read

Das leben Der Anderen 2006

هو فيلم ألماني بيدور في فترة قبل سقوط جدار برلين وقبل إتحاد المانيا الشرقية والمانيا الغربية ، الفيلم فكرته قايمة على التلصص والمراقبة ، وهي مراقبة أحد ظباط البوليس السري لكاتب وعشيقته الممثلة المعروفة وعلى علاقة بالبوليس السري ، وبعد مراقبة للكاتب والممثلة هيتعاطف الظابط معه .

فيلم حياة الأخرين من أحسن الأفلام اللي تعرفك شكل المرحلة فى الوقت ده كانت وازاي كانوا بيعيشوها المثقفيين قبل سقوط الجدار ، الفيلم مميز جداً والكتير بيعتبروا عبقري وده للأنسيابية في الأداء والنقلات في الفيلم في تسلسل وترابط ، عبقريته كمان ترجع انه وضح حاجات كتير بدون كلام ، زي مشهد رقص الوزير والممثلة ولمسة ليها ونظراته ليها في الحفلة وانه على علاقة بيها غصب عنها ،استحمامها المتكرر بعد اي مقابلة لشعورها بالقذارة وانها عايزة تتطهر ، إنجذاب الظابط للكاتب وتعاطفه معه وانه عايز ينقذه بأنه يبتدي يجنب بعض المعلومات اللي فيها ضرر ، وعلى الرغم من الفيلم بيتكلم عن الجاسوسية الا انه خالي من المطاردات وضرب النار ومشاهد التعذيب وده من أسباب أختلافه .

الفيلم بطولة أولريش موه ( الظابط ) ومارتينا جيدك ( ماريا ) وسبياستيان كوخ ( دريمان )و اولريك توكر ( جوبتر ) و توماس تيمة ( الوزير ) سيناريو وإخراج فلوريان هينكل والموسيقى التصويرية غبريال يارد .

الفيلم ممتع جداً وأداء الممثلين حقيقي والموسيقى التصورية للفيلم من أجمل التراكات اللي ممكن تسمعها ، والديكور والجو العام للفيلم مختلف عن فيلم اتعمل عن الفترة قبل سقوط الجدار ، الفيلم لوهلة ممكن وانت بتشوفه هتحسه تقليدي لكن النهاية والأحداث غير تقليدية بالمرة .

الفيلم خد جوايز كتير أبرزها أوسكار أفضل فيلم بلغة أجنية .

واخد على IMDb 8.4/10

الفيلم + 18

مشاهدة ممتعة جداً :)) 

خلود ~ ليسانس اداب فارسي جامعة القاهرة ومحررة صحفية سابقة لدي جريدة مصر النهاردة ومخرجة افلام قصيرة .
Journas

Never miss a story from us, get a weekly update to your inbox