الواقعية المميتة

4 sec read

جملة قريتها علي الحيطان مرة كانت بتقول ” لا تكن واقعي فالواقع قذر ” قريتها من كام سنة كده في صورة منشورة علي الفيس بوك وقت ما قريت الجملة دي كان سني صغير مش صغير اوي يعني لكني مكنتش مدركة معنها اوي زي دلوقتي ، الحقيقة الواقع فعلاً قذر وسخيف وبهدل برأتنا وفشخ أحلامنا – ياربي علي الكوكتيل الجميل ده –من الآخر كده مخلاش فينا .

الواقع لانه رمى أحلامنا الرومانسية في أقرب صندوق زبالة احنا فقدنا الحب ! احنا بقينا غير قادرين اننا نحب ، نحب بجد برومانسية لانه الموجود مبقاش حب بقى شقط بقى تسلية بقى  فراغ عاطفي اعجاب حتي  اي حاجة غير الحب  ، اصلاً الواحد دلوقتي لو قابل حب حقيقي مش هيتقاس بمقياس الحب والأخلاص والتضحية والكلام ده خالص – احنا اتغيرنا خالص يا لينا – بقى في هو شغال ايه ؟ – ده في الحالة الحب عن بعد يعني – هو خريج  ايه ؟ الوالد والوالدة لائقين للجواز بينا ولا بقى في اخواته متعلمين ولا علشان مهم برضو في كومنتات الجميلة بتاعت يابنتي ده مش حلو ! ده اسمر اوي – الغرض مش تريقة علشان محدش ياخدها على محمل العنصرية – يابنتي ده رفيع اوي ده تخين اوي يابنتي ده فلاح وكم يا في الموضوع بتتقال ، بقى في الحب مش هيأكلكوا مش هيغديكي حنان بقى في يابنتي ده مش شيك وده مبهدل و …

الحقيقة على الرغم اني بكتب الكلام ده وانا مش مقتنعة بيه او بمعني أصح بتكلم عنه وهو مش عاجبني بس للأسف لازم الواحد قبل ما يختار اللي يقع في حبه يركز  في اللي فوق ! طبعاً انا واخدة موضوع الحب من القشور او بمعني اصح من الناحية الرومانسية الباحتة .

مبقاش في الحب البييور مش كلاكيع وعقد وخوف تريقة طنط ميرفت ونظرات اكنل مدحت ! بنحط المجتمع ونظراتهم والظروف وكلام الناس كل ده واحنا بنقع في الحب اللي هو اصلاً هبة من ربنا كده بتيجي وقت ما تيجي ولأي حد من خلقه مش احنا اللي بنختار ، بقى لازم علينا نختار وبعدين نحب علشان كده مبقاش في حب ! بقى حب واقعي حب  سخيف حب مبني على شروط في اختيار مؤهلات الشخص مش صفاته لا احنا كده كمان ظالمين لفظ حب بصراحة يعني . الحب لو كان بشر كان انتحر على اللي حصل فيه . 

مبقاش في الحب المبني علي النظرات الحنان والفرحة والعنين البراقة والبرأة  مفيش ده خالص احنا فقدنا ده تماماً ، وفرضاً لو في يوم حسينا الشعور ده مش هنصدق مش هنقتنع اننا بنحب مش هنلاقي مسمي ليه هتعتبر نفسك اهبل وانك مش في واعيك علي الأرجح يعني وان عرفت حتي انك بتحب هتقول اكيد اللي حاسس ناحيته المشاعر دي مش كده انت بس العبيط و اوفر ! .

تحسوها بقت مقفلة كده ،المقال او الكلام ده شكله كلاسيكي المحتوي افلاطوني المضمون  لكن متهيألي الحب لازم يكون افلاطوني بس افلاطون والفلاسفة كلهم ميعرفوش اننا مبنصدقش مشاعرنا واننا عايشين مع انكل مدحت وطنط ميرفت ! . 

ملحوظة الصورة من فيلم Schindler’s list وملهاش علاقة بالكلام ده لو حابب تعرف اكتر عن الفيلم اقرا من هنا  

https://journas.com/kholoud/post/53348/schindlers-list

Journas

Never miss a story from us, get a weekly update to your inbox