الأستبن !!

2 sec read

الأستبن ! 

الأستبن في الطبيعي لازم يكون كاوتش معاك  ف عربيتك علشان لو عجله منهم نامت منك ولا حاجة تبدلها ، لكن كل ما تتعمق في علاقاتك وتركز فيها وتفكر هتلاقي برضه في استبن تاني غير الكاوتش ، الأستبن ده هو انت ! . 

مش شرط تكون انت بعينك لكن انت كأنسان بشري بقيت استبن ، او حتي انت بعينك لو ركزت شوية هتلاقى نفسك كنت استبن او انت حالياً استبن لكن مش واخد بالك ! .

استبن في علاقة حب انت كنت داخلها ، اللي قدامك بيفتكرك بس لما ميلاقيش صحابه او متلاقيش صحابها تفتكرك وتدور عليك ، لما تتخانق مع أهلها تفتكرك لما الشغل يقسي تفتكرك لما وقتها يسمح ولا فاضية وعايزة تخرج تفتكرك  ، في علاقة صداقة يفتكروك بس لما صحابهم التانيين ينسوهم او  يتخانقوا معاهم او يجيوا للغلبان اللي تحت ايدينا لما بنعوزه بنلاقيه من غير تردد او تفكير اللي يسيب حاله ومتحاله ويجي جري ، وانت ياعيني مسمي اللي بيحصل ده انك شخص مريح ده لما بتضيق عليهم بيجوا ، انا شخص كويس وحنين وبيحتويهم علشان كده بيجيوا لا الحقيقة انت مش شخص مريح انت استبن مريح ما بيشتكيش وبيشلوك ويحطوك براحتهم هما .

بخصوص موضوع الأستبن في الصداقة ده أصدق حاجه قريتها الفترة اللي فاتت كانت بتقول ” ربما لسنا الأصدقاء المفضلين لدي أصدقنا المفضلين ” ، الجملة يتقاس عليها حاجات كتير مش صداقة بس ، انت تستحق تكون المفضل ع طول ودايماً متحطش حد فوق قدره علشان مش هيقدر ده ومحدش كمان يستحق ده ، اوعي تخلي حد رقم واحد في حياتك انت ممكن تكون رقم اتنين في حياته ، حط الناس في قدرهم ، انت مش أقل من حد ولا مشاعرك حاجه يستهان بيها . 

الكلام مش مقصود بيه انك تقسي ع حد ، لكن انت تستحق تكون رقم واحد ، الحقيقة معنديش كلام واضح وصريح يعرفك انت استبن ولا لا ، لكن حاول انت متكونش استبن في حياة حد   .

الصورة من فيلم p.s i love you الفيلم ملهوش ريڤيو سابق ف المدونة لكنه حلو جداً ويستحق المشاهدة ، الصورة ملهاش علاقه اوي بالكلام لكنه حاطط نفسه استبن برضه . 

Journas

Never miss a story from us, get a weekly update to your inbox