السماء تمطر كرات اللحم

1 sec read

#افلام_ووجهات_نظر
فيلم #cloudy_with_a_chance_of_meat_balls
المترجم عربيا للسماء تمطر كرات لحم ..

فكره الفيلم ببساطة من غير حرق أحداث .. شاب مخترع اسمه ” فلينت لوكوود ” بيقدر يخترع آله بتعالج المياه وتحولها لاي طعام إنت عايزه .. قدر يعمل بيها نقلة للجزيره دى .. لكن المشكلة إن السحر اتقلب علي الساحر واتحولت الآله دى لشىء ممكن يخرب العالم وتتقلب بمأسآه ..

فيه كذا لقطة مهمة جدا في الفيلم ده ..

_ لقطة إن فلينت ما هموش سخرية الناس منه وعدم اهتمامهم بيه ونظرتهم ليه وكمل اختراعه وجنونه .. لو هنفضل نركز مع الناس مش هنتقدم خطوة ومحدش هيبصلك وانت فاشل انت هتلفت بس الانتباه لما تنجح قبل كده انت صفر او ع الهامش

_ لقطة ما ” فلينت ” قال ل ” سام ” المذيعة اللي حبها انها احلي بالنظارة والشعر المربوط ، وانها احلي فعلا لانها ده هي مش اللي الناس عايزين يشوفوه فيها .. احنا محتاجين في حياتنا للي يقولنا انت كده حلو اوى .. واللي جواك احلي مهما كان مظهرك ، انا بحبك كده لاني شفتك من جواك ! في اللحظة دى احنا فعليا بنرمي الكون كله ورا ظهرنا وبنسمع كلام اللي شافنا فعلا ..

_ اما أخطر لقطة .. كانت وسوسة المحافظ او عمدة البلد ل ” فلينت ” عشان يستمر في تشغيل الآله رغم الخطورة .. الفيلم بيختصر كل معاني الشراهه والجشع والجنون الكفيلة بمحو الضمير والعقل والمنطق في مقابل استمرار الشهوات دى ..
المحافظ بيحط ” فلينت ” بين اختياريين واحد غاية في الروعة وواحد غاية في السوء وبيقوله في الآخر القرار قرارك !! وده للاسف بيتعمل فينا سواء من أهلنا أو في إختيار الوظيفة أو أو سواء بعمد أو من غير ، وفي الآخر انت مطالب بقرار حر !! هو طبعا قرارك بس معروف في انهي اتجاه !

_ أما لقطة ما الشرطي بيطلب من “فلينت” طلب خاص في عيد ميلاد ابنه رغم انه في العادى قاسي في معاملته ، الفيلم ركز جدا علي نقطة إن الأب شىء والموظف أى كانت وظيفته شىء تاني خالص .. الأب مش قاسي ولا صارم ولا حاد .. الأب هو الأمان والحب مهما ما عرفش يعبر عن مشاعره

_ وده ينقلنا لأروع لقطة في الفيلم كله لقطة ما والد “فلينت “حب يقوله انا فخور بيك فاتكلم عن الصيد !! ولما ” سام ” ركبت مترجم المشاعر حول الكلام الملغبط ده لاجمل معاني ممكن تتقال من أب لابنه !
احنا للاسف في مواقف المشاعر اللي محتاجة تعبير بنعجز عن اختيار الكلمات و( بنكلكع ) الكلام عشان نهرب من الاحراج ده ساعات ما بتعرفش نقول ببساطة بحبك ، وحشتني ، انا ضايع من غيرك ، انا فخور بيك جدا !

الفيلم مليان مواقف مؤثرة خطيره .. ساعة ونص من المغامرة اللذيذه المشبعة بالأحداث اللي كل واحد يختار منها اللي تفرق معاه ..

Leave a Reply

Journas

Never miss a story from us, get a weekly update to your inbox