الذاكره في القلب

0 sec read

#افلام_ووجهات_نظر

فيلم #finding_dory
من الافلام اللي لازم تعشقها وتتفرج عليها وانت مستمتع .. دورى السمكة اللي عندها نسيان علي المدى القصير .. اللي لو عدت من واحد ل خمسه ممكن تنسي هيا كانت فين وبتكلم مين !!
دورى تاهت في الجزء التاني .. تاهت بس الغريب انها هي اللي لاقيتهم !!
احيانا بيكون توهانا علشان نرجع .. بنتوه ونضيع ونتغرب حتي عن نفسنا عشان نكتشف ان الطريق جوانا ..
في فيلم البحث عن دورى هتكتشف انها مرجعتش بذاكرتها .. رجعت بقلبها !
العقل بيفيدنا في تحصيل العلم اه .. في التحقيق من امر ما .. في الابتكار والتطوير ده اكيد ..
انما القلب هو الذاكره ..
القلب هو اللي فيه ادق التفاصيل واصغرها وهو اللي بيفكرنا بطريق رجوعنا وقت ما بنتوه ..
احيانا كتر تفكيرك ازاى تطلع من المصيبه بيضيعك اكتر !
واحيانا تانيه انك تاخد اول حل ليك خصوصا في مشكله عايزه حل سريع بيكون ده النجاه ..
اوقات سرعه البديهه هي التفكير السريع جدا .. او اللاتفكير !!
اللاتفكير استنادا علي غريزتك وقلبك في التوجه !
اوقات اللي بيحمينا وينقذنا هو جهلنا !
او بمعني ادق عدم ادراكنا لابعاد مرعبه ممكن تثير جوانا خوف من الاقدام والتحرك ..
اوقات بنستغرب ليه الاطفال تحت سن الخمس سنين مابيخافوش من حاجات تخوف .. ببساطه لان معندهمش ادراك لمعني ” يخوف ” مايفهموش معني ” خوف ” خوفهم الوحيد بس واللي يعرفوه ان بابا وماما مايكونوش حواليهم وبس
احنا بنفقد شغف الطفوله والتلقائيه والمرونه كل ما بنكبر .. لاننا بنفتكر .. لان ذاكرتنا بتتملي تراكمات من اوجاع ومواقف مؤلمة وخذلان منع اى ذكرى طفولية انها تطلع للسطح ..
مع دورى قضيت اكتر من ساعه ونص في استعاده ذاكره الاطفال التي لا تبالي .. جرعه نسيان لازم نتجرعها عشان نقدر نعيش ونكمل .. قلب لازم يتشال التراب من عليه عشان يفتكر الطريق ..
انصحكم بمتعه مشاهدة الفيلم ده …

Leave a Reply

Journas

Never miss a story from us, get a weekly update to your inbox