الحروف الراقصة

1 sec read

#افلام_بين_الواقع_والخيال

فيلم #Like_stars_on_earth

وعودة للهاشتاج ده ..

للي لسه اول مرة يقرأ لي حاجة تحت الهاشتاج ده ..

انا بتناول فيه فيلم ناقش مرض او دواء طبي .. بقول نبذه عن المرض في العموم .. واللي اتقال في الفيلم .. وهل الفيلم قدم الحقيقة ولا الخيال ؟!

معانا النهارده فيلم ناقش مرض إسمه ” تعسر القراءة والكتابة ” dyslexia..

ببساطة شديدة دون الدخول في تفاصيل ..

المرض بيكون ناتج عن خلل عصبي وليس له أى علاقة بالتأخر العقلي بل العكس بيظهر لمتوسطي الذكاء وللنابغين ..

وأيضا المرض ليس له علاقة بصعوبات التعلم الناتجة عن ضعف السمع او البصر او البيئة المحيطة ..

الطفل بيواجه إضطراب في قراءه الحروف او المقاطع ذات السجع الواحد المتشابهه كمثال بسيط saw/ was او d/b .. صعوبة في الهجاء والنطق وتكوين جملة ..

طب هل فيه علاج دوائي الطفل ممكن يتعاطاه فيخف ؟

الطفل بيكون له تعامل خاص خصوصا من متخصصي علم النفس التربوي .. بيكون له طرق تعليمية للتحصيل خاصة .. بيقدر بعدها الطفل يمارس حياته عادي جدا خصوصا إن أغلب المصابين بالمرض بيكونوا أذكياء ونشيطين جدا .. بالذات لو تم إكتشافهم واحتوائهم مبكرا ..

ندخل بقي ع الفيلم ..

حقيقي الطفل أبهرني جدا بأدائه.. هو أينعم الفيلم بطولة عامر خان .. بس الطفل هو البطل ..

هنعيش معاه حيرته هو ليه الحروف بترقصله ؟

وليه اخوه شاطر وأذكي ؟

وليه باباه ومامته دخلوه مدرسة خاصة ؟

ويبقي السؤال الأهم اللي بيطرحه الفيلم ..

انتوا عايزين من ولادكم ايه ؟

انتوا مش عايزينهم الأوائل وأعلى الدرجات عشانهم ( لان ببساطة الطفل بالذات سن الطفولة ولا يفرق معاه )

انتوا عايزين الفخر الخاص ليكم !

عايزين التباهي بدرجاتهم وكأن ده نجاحكم انتوا .. ولو فشل الطفل في إمتحان او قل في الدرجات .. ففجأه هيبقي الطفل الملعون .. وفجأه هتنسوا أن دوركم كأب وأم هو الاهتمام والاحتواء . وهينصب هدفكم في حاجة واحده .. لازم الطفل ده يبقي شاطر ولو علي حساب قتل طفولته !!

الفيلم بيطرح تساؤل تاني ؟

لو طفلك معاق هتتبرى منه ؟

طب لو طفلك فاشل هتطرده ؟

فرضا ابنك نابغ في هواية بعيده عن التفوق الدراسي! هنقول مثلا رياضة ، رسم ، غناء .. هتموت موهبته عشان دراسته اهم ؟

أهم حوار دار في الفيلم .. كان حوار بين الاستاذ ” رام ” والاب عن الاهتمام ..

الاهتمام كلمة كبيرة … انا مهتم بيك يعني يوم ماتخاف تجيلي انا .. يوم ماحد يسخر منك تتحامي فيا انا .. الاهتمام يعني انا عمرى ماهكون سبب وجعك او دموعك ..

الاهتمام مش اكل وشرب وفلوس ..

الاهتمام احتواء ..

الفيلم مكدس مشاعر تربوية محتاج يشوفها كل أب وأم خصوصا في فترة الإمتحانات ..

محتاجين عموما نفهم يعني إيه قتل طفولة ببساطة بسبب عدم الاهتمام !

واخيرا .. فالفيلم قدم معلومات صحيحة جدا عن المرض بشرح جيد جدا .. قدم نماذج للمرضى بأسلوب ناضج جدا ..

الفيلم ابعد ما يكون عن نموذج الافلام الهندي السخيف .. اعتبروه فيلم امريكي ..

ارشحه بقوة لمحبي النوع ده من الافلام .. خصوصا إنه قدم الواقع وبعد عن الخيال ..

Journas

Never miss a story from us, get a weekly update to your inbox